نصوص أدبية

وقروا موتاكم

دخل االعم وجدان للديوان بادية عليه علامات الاستياء والجزع بشكل واضح، القى السلام على الحضور، واخرج علبة سكائره، مستخرجا سيكارته على عجل واصابع يده ترتجف كم ن يستشعر بردا شديدا، حتى انه لم ينتبه الى اشعالها من جانب الفلتر، لولا تنبيه الحاج مردان له.....

حجي (وجدان) عدل جكارتك خويه، هاي شبيك اليوم، اشو اشوفك مو عله بعضك ابدا؟؟؟

والله ياحجي ما ادري شكلك وشسولفك، اليوم شفتلي حادثه ماتخلي براس بنادم عقل.....

هساه اريد اسأل كل واحد منكم... من يروح للزياره يو باي سفره ايصير اهوه يگعد بالسدر ويشد ابوه فوك على سطح السياره؟؟؟؟

حجي بروح ابوك هو هذا سؤال يساله عاقل، هاي شلون ترضاه، حتى المسودن وما عنده غيره وماعنده دين ولا اخلاق اليسويه.....

عمي انه اعرف انتم هاي ماتسونه وماتسون حتى اتشدونلكم حيوان على سوباية السياره مو الدور والديكم ابهاتكم وامهاتكم يو أي عزيز من اعزازكم يو معارفكم....

لكن ادور اريد اسال :-

احنه اهلنه واحبابنه انقدرهم بس بحياتهم، يو يستمر تقديرنه الهم حتى بمماتهم، ويا ويله اليشتمهم يو يمسهم بسوء يو يجيب طاريهم بالموزين بعد مماتهم؟؟؟؟

اخذ الحضور ينظر بعضهم بوجه بعض، متسائلين بما اصاب العم وجدان هذا اليوم، وماهو الغرض من اسئلته الغريبه اليوم؟؟؟

فبادره الحاج (مردان) قائلا:-

(وجدان) بروح ابوك ليش ما تطب بالموضوع مباشرة ولا تشلع كلوبنه باسئلتك الغريبه هاي، سولفنه بالشفته اليوم؟؟؟

وانه جايكم بالدرب شفت سياره كيه وفوكه جنازة، تريد تصعد الجسر، وبصعوده للجسر وما اشوف اله التابوت يفلت من سلة السياره ويتطشر على الشارع وانفضحت جثة المرحومه..... والله ما اگدر اكمل توصيف المشهد المؤلم وشصار بحال المرحومه واهله ولمت الوادم والصياح والنياح.....

وهذا المشهد المخزي نشوفه كل يوم والجنايز عله ظهو السيارات مربطه بالحبال تچي من ابعد المدن والارياف مودينه للمقبره...اهل الميت ولده واخوته واصدقائه واقاربه كاعدين مرتاحين على كراسي السيارة تحت التبريد والتدفئه و(العزيز) مربط عل ظهر السياره، تحت البرد والتراب والشمس حتى من توكف السيارة بمطعم يو بكازينو الجماعه ياكلون ويشريون و (العزيز) مربوط عله ظهر السياره !!!!

والمصيبه انروح ننصب چوادرنه ونسويله فاتحه بملايين الدنانير ترحما على روحه !!!!

اگول ليش ما تتخص سياره مقفله مكيفه لنقل جثامين الموتى باحترام.... نوديه نغسله ونزوره ونوديه لقبره مكرم معزز مو حاله حال الحيوان يو جنطه مربوطه عله السله، واظن هاي الخدمة ما تكلف هوايه قياسا لما نصرفه على الفواتح والبرهج الفارغ.... واكيد من يتبنى تاسييس مثل هذه الخدمة المكونه من عدد من السيارات راح يربح بالدنيه والاخره لتوقيره جثامين اخوانه وابناء دينه ووطنه بدل مما يتعرضون له من الاهانة والاذلال بلطريقة الحاليه....

بروح والديكم هذا الحجي حگ باطل؟؟؟

نطق الجميع بكلمة واحده والله حجي كلامك ذهب وفوگ الحگ، بس ما ندري ليش الوادم ما فاطنه لهل القضيه؟؟

عمي وادمنه شي يقلد شي... شافوا الگبلهم سو هچي همه تبوعوهم، من غير مايعرفون ان اجدادنه ما كان عدهم وسيلة نقل مثل ماعدنه اليوم، چانوا ينقلون الجنايز علىظهور الحيوانات يو بالمهيلات وعله ظهور السفن، فمن تطورت وسائل النقل هم ما تطورا وياه....

 عمي (وجدان) نب مسعو الگهوجي:-

هساه اليسمع حچيك راح ياخذ بيه؟؟

بويه والله انه من زمان اگول هذا غلط ومو صحيح عمي لاتهينون موتاكم بهاي الطريقه، وحلفت ويلادي يحطوني بستوته ولا ايشدوني على قمارة السياره حتى لو السياره روز رايز....

لكن يعمي الوادم ماتسمع كلامي... تتنوع لحلوك المومانه.... وما ادري ليش اهل العمايم ليش ساكتين عله هل الظاهرة المهينه/ للانسان....

وشوفوا شحلاتهم اخوتنه المسيح وغيرهم وبالدول المتقدمة مخصصين سيارات سوداء مكيفه لنقل الجنايز ومقابرهم شلون مزروعه ورد ونافورات ماي ومنظمه.... مو مثل حال مقابرنه.... تلكيه شي فوگ شي وموغربه تشوف شخص يتغوط او يتبول فوق او قرب احد القبور لان مقابرنا خاليه من هاي الخدمات....

عمي سعود ناوشني فنچان كهوه بروح ابوك.... وانه اعيد كلامي ومشكول الذمه من أ موت لا تشدوني عله ظهر السيارة حتى لو تدفنوني بمچاني، ولا تسولي فاتحه....

حميد الحريـــــــــــــــزي