نصوص أدبية

قدم العم وجدان اليوم الى الديوان، وقد لاحظ الجمع المنتظر انه يجر نفسه جرا حيث يبدو متعبا، وان العم يخفي تحت ابطه شيئا لايعروفن ما هو .....

دار همس بين الحاضرين، طلب منهم الحاج مردان التمهل قليلا حتى يتبينوا حقيقة الامر منه حين يدخل ..

القى (وجدان) السلام على الحضور بصوت واهن، ثم جلس جوار الحاج "مردان" وقد مساه الحضور بالخير فرد عليهم

- صبحكم الله بالخير والعافيه ...

- شنهو السالفه عمي وجدان يصير ساعتتك اليوم متشتغل، عمي هسه الدنيه العصر .

- تململ في مكانه ثم اخرج من تحت ابطه رغيف من الخبز قائلا:-

- عمي الله وكيلكم انه بعدني لساه ما متغدي وروحي هساه مسلوحه من الجوع .

- شنهي (وجدان) اشصاير اليوم، ايصير معزبتك الجديده زعلانه عليك ....

- لا والله عمي موش زعلانه بس يعمي اشتهيت اليوم مرگة بانيه وتمن، وجبتلي ربع لحم من السوگ ردت أشوف طبخه شلونه ؟؟؟؟

اشو اجه الغده لن التمن چنه حلاوة، والمرگه عصيده واللحمات ما لهن ذكر...

طلعت مرحومة الوالدين العربفه بس لسان وبدي، فعل ماكو

التمن حاطه فوگه الدهن وطايحتله حمس لمن مسومر، وبعدين حاطه عليه الماي ودابغة ملح ..... فصاير جنه خبطة لبن طين .

والمرگه ... حامسه ابلبانيه بغير تجعيم وذابه وياه روس ثوم ويه الدهن .... وطاسه الجدر ماي لمن صارت البانيه بخته، وروس الثوم مبربعه بالماي جنه عجاريج مطوفه .... فصارا البانيه عصيده واللحمات تگول غافلني العتوي ولگفه وشرد!!!!

بربكم هو هاذا طبخ يو مثل واحد يلعب ب.....

 ضحك الجميع مع استغرابهم لجهل وغباء هذه المراة، امر له مردان بغداء على وجه السرعة من داره ... وبعد ان اكمل غداءئه وشرب الشاي وفناجين القهوة، وولع سيكارته .... سأله الحاج مردان عن مقصده من كل هذه الحكاية ...

-  خويه حجي مردان وما يهونون الجماعه ارد اگول :

- ان الانسان الجاهل واللي يتفرعن الشغله مو شغلته، يگلب الفو گ تحت ويخربط الاول والتالي، حتى لو وفرتله كل مستلزمات العمل لانه مايعرف شلون يستعمله ولا وين يحطه، وهل شفتو مرحومة الوالدين شلون ضيعت اللحم ومثل مايگول ابو المثل (رزق البزازين عله المدعثرات) والتمن والدهن والبانيه بغير فايده، ولونه مره معدله جان سوته طبخه تنوچل من وراه الاصابع .

-  اما رباط الحچي حكومتنه من كل الاختصاصات، توفرت الهم كل مستلزمات الحكم، فلوس وناس او وكت او راحه وشلون خربوا كلشي، واحنه ما حصلنه لاامن ولا خدمات، ولا ديمغراطيه، هم شايفيليكم حكومه عده حرب سوده بلا وزير داخليه ولا وزير دفاع واحنه عدنه عشرات اذا مو مئات القاده الوطنينين والمجربين الگاعدين ببيوتهم، لانهم مايريدون ايطبون تحت صاية المحاصصة الطائفية ؟؟؟

ولون هاي الخيرات والخبرات بيد حكومه رشيده وفاهمه چان احنه اليوم باحسن حال .

اعجب الحضور كلام وحكاية ورباط حكاية العم (وجدان) وقالوا بصوت واحد:

(مو كلمن تلزم الچفچير طباخه).

حميد الحريزي