أقلام حرة
ليل وسهر
وإلى عام 2015
آه يا ليل السهر
ليل السهر
كلش صعب عل المغترب
ليله آهات وقهر
يومه محطات وسفر
والبعيدين
حايرين و سهرانين
مشركين ومغربين
ودومهم تعبانين
ومن يجي الليل الحزين
عيونهم تنزف دمع
دمعه دمعه
والدمع ينكط حنين
******
تعرف المفارك وطن
يسحن بروحه سحن
مره يكعد بالمطار
ينتظر طول النهار
ما يهمه الانتظار
بلكت الدنيه تهون
والبعيدين الباله يجون
*****
آه من ليل البرد
بليل البرد
أحسب سنيني وعد
يمته لدياري أرد
و الوطن دومه يصد
عيوني تربه عل الدرب
ساعه أشب وساعه أهب
آه من ليل البرد
شكد ثكيل وشكد جلد
عمر واتعده يا حيف
مثل غيمه ومطر صيف
زخه مره وتنتهي
والسحب من تنجلي
كل أثر يصبح طيف
آه منك يا زمن
كافي مو ضاع الوطن
بين حانه وبين مانه
الشعب ضيع زمانه
مرات ياخذني العجب
أسأل وادور عل السبب
أعتب على الباغي السلب
لو أعتب على هذا الشعب
هذا الشعب العاف النهب
الباك السله والعنب
مسكين يداري علته
بس النوايه حصته
بيته انهدم عقله خرب
مو مشكله وما كو عجب
باجر نعالج محنته
ونبنيله بيت من الكصب
مغدور يا هذا الشعب
طول العمر صاير حطب
للحرب وتجار الذهب
***
مرات أزورك بالحلم
يا وطن بلكت اكولن تمر
يا وطن مو ضاع العمر
وضيعنا حفنه سنين
بين يا ليل وين الصبح
ويا ليل منتظرين
وما نلكه بالباب المحب
لا طيف ولا نسمه تهب
ولا كلمة مشتاكين
ورغم المحن
أرجع وصيحن وانسحن
أفيش ياريحة وطن
وشكثر ما يغله الثمن
يبقه الوطن طول الزمن
مزيون بناسه الطيبين
****
يا هو اليرد لي فرحتي
وانسه زماني بغربتي
يزي سهر ويزي برد
تلكاني كل ساعة أعد
وكلما أود لكن أرد
الليل البرد
*******
إلى عام 2015
وبعد كل هذا أتانا العيد
عام جديد بلا بريد
وعلى جدار بيتنا البعيد
الساعة الشمطاء في وهن تدور
وعقاربها الوسنى بدأت تخور
وقد تعيد دقاتها لحن النشور
لحن المآسي والشرور
وعلى العراق يمر عام وإثر عام
الجوع والخوف والموت الزؤام
هو الجديد ؟
طاحونة الموت تفتك بالعديد
وتذبح الوليد من الوريد للوريد
ويعلن القاتل هل من مزيد؟
وأنا هنا استقبل العام الجديد
بالصمت والزمن البليد
لا شيء غير الريح واليوم الكسيح
ومنذ حين تطرق بابنا ندف الجليد
وليلنا القهار يبطش بالنهار
والغيمة الدكناء تفترش الفضاء
كخيمة سوداء وتحجب الضياء
عن رونق البهاء في السماء
وقد تزول وإن تطول
وعسى البريد يحمل بين أوراقه
النبأ السعيد ويطرد الحزن الشديد
عن العراق وشعبه المجيد
لكنما عام الجليد بلا بريد
***
عذرا يا وطني
فبالرغم من حالي
سيبقى وجهك في بالي
لطفي شفيق سعيد
الأول من العام الجديد 2015
